កំពង់ចាម: ឯកឧត្តម អ៊ុន ចាន់ដា អភិបាលខេត្តកំពង់ចាម នាព្រឹកថ្ងៃទី៣០ ខែមករា ឆ្នាំ២០២៥នេះ បានដឹកនាំមន្ត្រីជំនាញ ចុះអន្តរាគមន៍បង្ហូរទឹកបញ្ចូលប្រព័ន្ធធារាស្ត្រ ក្នុងតំបន់ដែលប្រឈមខ្វះខាតទឹកស្រោចស្រព នៅស្រុកស្រីសន្ធរ ខណៈប្រព័ន្ធធារាសាស្ត្រនេះបានហូរទៅជួយកសិករធ្វេីស្រែដល់បណ្តាលឃុំមួយចំនួនក្នុងស្រុកខ្សាច់កណ្តាល ខេត្តកណ្តាលទៀតផងដែរ ។
ទន្ទឹមនឹងនេះដែរ ប្រជាកសិករក្នុងឃុំខ្នាសរ នៃស្រុកស្រីសន្ធរ បានសម្តែងអារម្មណ៍សប្បាយរីករាយ នូវពេលឃេីញថ្នាក់ដឹកនាំ អាជ្ញាធរខេត្ត និងមន្ត្រីជំនាញបានចុះមកពិនិត្យស្ថានភាពជួយសង្គ្រោះស្រូវរបស់ប្រជាកសិករដល់ទីតាំងផ្ទាល់។ ហេីយពួកគាត់បានថ្លែងអំណរគុណដល់រាជរដ្ឋាភិបាលដែលបានជួយដោះស្រាយកសាងប្រព័ន្ធធារាសាស្ត្រខ្វាត់ខ្វែង និងបន្តបូមទឹកបង្ហូរទៅតាមតំបន់ប្រឈមខ្វះខាតទឹកប្រេីប្រាស់ទៀត។
ក្នុងឱកាសចុះជួបប្រជាកសិករធ្វេីស្រែប្រាំងក្នុងស្រុកស្រីសន្ធរនៅពេលនេះ ឯកឧត្តម អ៊ុន ចាន់ដា អភិបាលខេត្តកំពង់ចាម បានជំរុញឲ្យមន្ត្រីជំនាញជាពិសេសមន្ទីរធនធានទឹកនិងឧត្តុនិយមខេត្តត្រូវសហការគ្នាជាមួយអាជ្ញាធរស្រុក ធ្វេីយ៉ាងណាយកចិត្តទុកដាក់ជួយដោះស្រាយនិងអន្តរាគមន៍សង្គ្រោះស្រូវដែលកសិករដាំដុះកុំឲ្យជួបប្រឈមបញ្ហាខ្វះខាតទឹកស្រោចស្រពខ្លាំង។
គួរបញ្ជាក់ថា បេីតាមការបញ្ជាក់ពីមន្ត្រីនៃមន្ទីរធនធានទឹកនិងឧត្តុនិយមខេត្តកំពង់ចាម បានឲ្យដឹងថា ប្រព័ន្ធធារាសាស្ត្រក្នុងស្រុកស្រីសន្ធរនេះបានជួយដល់ប្រជាកសិករប្រកបរបរធ្វេីស្រែចំការបានចំនួន៩ឃុំ ក្នុង៧ឃុំក្នុងស្រុកស្រីសន្ធរ ខេត្តកំពង់ចាម និង២ឃុំទៀត ក្នុងស្រុកខ្សាច់កណ្តាល ខេត្តកណ្តាលផងដែរ ៕
