“ចិនពង្រីកការបើកទូលាយគឺមាននិរន្តរភាពនិងស្ថិរភាព ការរំពឹងទុកបែបនេះមានសារសំខាន់ណាស់ចំពោះសហគ្រាសទុនបរទេស ហើយក៏ជាមូលដ្ឋានគ្រឹះនៃទីបង្អែកនិងជំនឿចិត្តរបស់យើងក្នុងការធ្វើអាជីវកម្មយ៉ាងស៊ីជម្រៅនៅប្រទេសចិន ។

”ប៉ុន្មានថ្ងៃជាប់មកនេះ លោកស្រី Wang Cong អគ្គនាយករងនៃក្រុមហ៊ុន Novonesisដ៏ល្បីឈ្មោះរបស់ដាណឺម៉ាកប្រចាំតំបន់អាស៊ីប៉ាស៊ីហ្វិកបានតាមដានយ៉ាងដិតដល់ចំពោះព័ត៌មានគោលនយោបាយដែលបញ្ចេញដោយមហាសន្និបាតនៃសភាទាំងពីររបស់ចិន ។

លោកស្រីបានថ្លែងថា របាយការណ៍ការងាររដ្ឋាភិបាលចិនឆ្នាំនេះបានគូសបញ្ជាក់ថា ត្រូវពូនជ្រំឧស្សាហកម្មអនាគតដូចជាផលិតកម្មជីវសាស្ត្រជាដើម ដែលបង្ហាញទុកជាមុនថា វិស័យនេះគឺមានលំហអភិវឌ្ឍន៍ធំណាស់ ។
ការតាមដានយ៉ាងដិតដល់ចំពោះមហាសន្និបាតនៃសភាទាំងពីររបស់ចិន ជាវគ្គសិក្សាចាំបាច់សម្រាប់មន្រ្តីគ្រប់គ្រងជាន់ខ្ពស់នៃសហគ្រាសបរទេសនៅចិនដូចលោកស្រី WangCong អ៊ីចឹង ។

គិតមកទល់ចុងឆ្នាំ២០២៤ សហគ្រាសដែលពាណិជ្ជករបរទេសវិនិយោគនិងបង្កើតនៅប្រទេសចិនមានចំនួនលើសពី១លាន២សែន៣ម៉ឹន៩ពាន់សហគ្រាស បានប្រើប្រាស់ទុនបរទេសជាក់ស្តែងចំនួន២០,៦ទ្រីលានយាន់ប្រាក់ចិន ។ នៅឆ្នាំ២០២៤ អត្រាផលកម្រៃរបស់សហគ្រាសឧស្សាហកម្មទុនបរទេសធុនមធ្យមនិងធំរបស់ចិនគឺខ្ពស់ជាងអត្រាផលកម្រៃរបស់សហគ្រាសឧស្សាហកម្មធុនមធ្យមនិងធំទូទាំងប្រទេសចិនចំនួន១,២ភាគរយ ។

របាយការណ៍ការងាររដ្ឋាភិបាលឆ្នាំនេះ បានចាត់ទុក“ការពង្រីកការបើកទូលាយចំពោះអន្តរជាតិប្រកបដោយកម្រិតខ្ពស់និងលំនឹងពាណិជ្ជកម្មជាមួយបរទេសនិងលំនឹងការវិនិយោគទុនបរទេសយ៉ាងសកម្ម”ជាភារកិច្ចធំមួយក្នុងចំណោមភារកិច្ចធំៗទាំង១០នៃការងាររដ្ឋាភិបាលចិនឆ្នាំ២០២៥ ។

ពីការពង្រីកកន្លែងពិសោធន៍ក្នុងវិស័យទូរគមនាគមន៍ សុខាភិបាលនិងការអប់រំជាដើម ដល់លើកទឹកចិត្តឱ្យវិនិយោគិនបរទេសពង្រីកការវិនិយោគទៀតនិងធានាយ៉ាងប្រាកដប្រជានូវការផ្តល់ផលអនុគ្រោះដូចគ្នានឹងជនជាតិចិនដល់សហគ្រាសទុនបរទេសក្នុងវិស័យជាច្រើន រហូតដល់ការបន្តបង្កើតបរិយាកាសប្រកបអាជីវកម្មដ៏ល្អប្រសើរដែលប្រកបដោយលក្ខណៈទីផ្សារភាវូបនីយកម្ម និយតកម្មនិងអន្តរជាតូបនីយកម្ម របាយការណ៍បានបញ្ចេញសញ្ញាយ៉ាងច្បាស់លាស់ថា ទ្វាររបស់ចិនកំពុងបើកចំហរឹតតែធំ ហើយទីផ្សារទុនបរទេសនឹងមានឱកាសកាន់តែច្រើន ។

ឆ្ពោះទៅរក “ការច្នៃប្រឌិតថ្មី”ជាលក្ខណៈពិសេសដ៏ច្បាស់លាស់នៃការអភិវឌ្ឍសេដ្ឋកិច្ចរបស់ចិនក្នុងរយៈពេលប៉ុន្មានឆ្នាំកន្លងទៅនេះ ហើយក៏បានផ្តល់លក្ខខណ្ឌអំណោយផលថ្មីសម្រាប់សហគ្រាសទុនបរទេសធ្វើអាជីវកម្មយ៉ាងស៊ីជម្រៅនៅប្រទេសចិនដែរ ។ ក្នុងមហាសន្និបាតនៃសភាទាំងពីររបស់ចិនឆ្នាំនេះ ថ្នាក់ដឹកនាំកំពូលរបស់ចិនបានគូសបញ្ជាក់ថា “ការច្នៃប្រឌិតថ្មីខាងបច្ចេកវិទ្យានិងច្នៃប្រឌិតថ្មីខាងឧស្សាហកម្មជាវិធីសាស្រ្តមូលដ្ឋានសម្រាប់អភិវឌ្ឍកម្លាំងផលិតកម្មគុណភាពថ្មី” ។ នេះបានទាក់ទាញការឆ្លើយតបជាទូទៅយ៉ាងទូលំទូលាយរបស់សហគ្រាសទុនបរទេសនៅប្រទេសចិន ។ ពួកគេកំពុងរៀបចំយ៉ាងសកម្មនូវ “ផ្លូវប្រកួតថ្មី”និងលើកកម្ពស់កម្លាំងប្រកួតប្រជែង ។

សហគ្រាសទុនបរទេសនាំគ្នាជ្រើសរើសការធ្វើអាជីវកម្មយ៉ាងស៊ីជម្រៅនៅប្រទេសចិន មូលហេតុមិនពិបាកយល់ឡើយ ពោលគឺទីផ្សារទ្រង់ទ្រាយធំ ប្រព័ន្ធខ្សែសង្វាក់ឧស្សាហកម្មនិងខ្សែសង្វាក់ផ្គត់ផ្គង់ដ៏ល្អពេញលេញប្រកបដោយប្រសិទ្ធភាពខ្ពស់ បរិយាកាសច្នៃប្រឌិតថ្មីដ៏ល្អប្រសើរជាបន្តបន្ទាប់ ការផ្គត់ផ្គង់ធនធានមនុស្សប្រកបដោយគុណភាពខ្ពស់ដ៏គ្រប់គ្រាន់និងតម្រូវការប្រើប្រាស់ដែលអាប់ដេតជាបន្តបន្ទាប់ ។ល។ សម្លឹងមើលទៅកាន់ពិភពលោក ឧត្តមភាពបែបនេះមិនងាយថតចម្លងបានទេ។ “ការធ្វើអាជីវកម្មយ៉ាងស៊ីជម្រៅនៅប្រទេសចិន” ជាការដើរស្របតាមទិសដៅតែមួយផង ហើយក៏ជាការផ្តល់ផលប្រយោជន៍ដល់គ្នាផងដែរ វាពិតជាឱកាសដ៏សមស្រប៕