(កំពង់ធំ)៖ ក្នុងយុទ្ធនាការផ្សព្វផ្សាយនេះដែរ ក៏មានការអញ្ជើញចូលរួមពីលោក សៀន ហុកហេង ប្រធានការិយាល័យសុខភាពសិក្សា នៃមន្ទីរអប់រំ យុវជន និងកីឡាខេត្តកំពង់ធំ និងលោក ប៊ី រីដែន មន្ត្រីអង្គការហែឡែនខែលល័រអន្តរជាតិប្រចាំខេត្ត ប្រធាន អនុប្រធាន និងមន្ត្រីទទួលបន្ទូកសុខភាពសិក្សារបស់ការិយាល័យអប់រំ យុវជន និងកីឡា នៃរដ្ឋបាលស្រុកទាំង៣ មន្ត្រីសុខាភិបាល នៅតាមមណ្ឌលសុខភាពគោលដៅ លោកមេភូមិ គ.ក.ន.កឃុំ អ្នកទ្រទ្រង់សុខភាពភូមិ ប្រជាពលរដ្ឋ មាតាបិតា អាណាព្យាបាលសិស្ស និងសិស្សានុសិស្ស ប្រមាណ១០,៦៨០នាក់ នៅថ្ងៃទី១២ ខែកុម្ភៈ ឆ្នាំ២០២៥។
លោក ប៊ី រីដែន បានលើកឡើងថា ដើម្បីចូលរួមសម្រេចបាននូវវិធានការគន្លឹះទី៣ របស់វិស័យអប់រំ ដែលជាអនុសាសន៍ដ៏ខ្ពង់ខ្ពស់របស់សម្ដេចមហាបវរធិបតីហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ចាប់ពីថ្ងៃទី១០ ដល់ថ្ងៃទី១៤ ខែកុម្ភៈ ឆ្នាំ២០២៥ មន្ទីរអប់រំ យុវជន និងកីឡាខេត្តកំពង់ធំ បានសហការជាមួយអង្គការហែឡែនខែលល័រអន្តរជាតិ(Helen Keller.Int)ប្រចាំខេត្តកំពង់ធំ ចុះអប់រំផ្សព្វផ្សាយអំពីហានិភ័យនៃជំងឺមិនឆ្លងនៅកម្ពុជា នៅតាមគ្រឹះស្ថានសិក្សាគោលដៅរបស់គម្រោងទាំង៤០សាលា ដែលក្នុងនោះ នៅស្រុកតាំងគោកមានចំនួន១៤សាលា ស្រុកសន្ទុកចំនួន១៣សាលា និងស្រុកស្ទោងចំនួន១៣សាលា។
លោក សៀន ហុកហេង ប្រធានការិយាល័យសុខភាពសិក្សា នៃមន្ទីរអប់រំ យុវជន និងកីឡាខេត្តកំពង់ធំ បានបង្ហាញពីគោលបំណង ដើម្បីបញ្រ្ជាបការយល់ដឹងពីប្រភេទជំងឺមិនឆ្លង និងកត្តាហានិភ័យធំៗទាំងបួនដែលនាំឱ្យមានជំងឺមិនឆ្លងគឺ÷ ១.ទម្លាប់នៃការទទួលទានអាហារប្រៃពេក ផ្អែមពេក និងខ្លាញ់ច្រើន។ ២.កង្វះការហាត់ប្រាណ ឬសកម្មភាពរាងកាយ។ ៣.ការទទួលទានគ្រឿងស្រវឹង។ ៤.ការទទួលទានបារី ព្រមទាំងពីវិធីការពារពីការកើតឡើងនៃជំងឺមិនឆ្លង ដោយការយកចិត្តទុកដាក់ក្នុងការទទួលទានអាហារដែលផ្ដល់នូវសុខភាពគឺស្ករតិច អំបិលតិច និងខ្លាញ់តិច ការហាត់ប្រាណឱ្យបាន៣០នាទីជាប្រចាំ កាត់បន្ថយការទទួលទានគ្រឿងស្រវឹង និងបញ្ឈប់ការជក់បារីជាដើម។
ជាមួយនេះដែរ មន្ត្រីសុខាភិបាល នៅតាមមណ្ឌលសុខភាពគោលដៅ ក៏មានការពិនិត្យសុខភាពជូនប្រជាពលរដ្ឋដែលបានចូលរួមដោយឥតគិតថ្លៃ ដោយមន្ត្រីនៃមណ្ឌលសុខភាព ព្រមទាំងមានការចូលរួមហាត់ប្រាណរយៈពេល៣០នាទី ពីលោកគ្រូ អ្នកគ្រូ មាតាបិតា អាណាព្យាបាលសិស្ស និងសិស្សានុសិស្សតាមសាលារៀននីមួយៗផងដែរ។ អត្ថបទ មន្ទីរអប់រំ យុវជន និងកីឡាខេត្តកំពង់ធំ
