ព្រះវិហារ៖ នៅព្រឹកទី២០ ខែកុម្ភៈ ឆ្នាំ២០២៥ នៅសាលាស្រុករវៀង ខេត្តព្រះវិហារ បានរៀបចំសិក្ខាសាលា បិទបញ្ចប់គម្រោង ជំហាន១ ការធ្វើឱ្យឡើងនូវការគ្រប់គ្រងសុខភាព និងអនាម័យពេលមករដូវរបស់ក្មេងស្រី នៅតាមសាលារៀនដាច់ស្រយាល នៅក្នុងខេត្តព្រះវិហារ ក្រោមវត្តមានលោកជំទាវបណ្ឌិត សឿ សុជាតា អនុរដ្ឋលេខាធិការនៃក្រសួងអប់រំ យុវជន និងកីឡា និង លោកជំទាវបណ្ឌិត ឆាយគឹម សុទ្ធាវី ប្រធាននាយកដ្ឋាន សុខភាពសិក្សា លោក ហេង សុខុម អនុប្រធានមន្ទីរអប់រំ យុវជន និងកីឡាខេត្តព្រះវិហារ លោក ជួប បរុស សន្តូ អភិបាលរងស្រុករវៀង លោក ផេង គា នាយកប្រតិបត្តិអង្គការទឹកភ្លៀងកម្ពុជា លោក លោកស្រីតំណាងអង្គការមិនមែនរដ្ឋាភិបាល លោកគ្រូអ្នកគ្រូ ព្រមទាំងយុវសិស្សជាច្រើននាក់បានអញ្ជើញចូលរួមផងដែល។

នាឱកាសនោះ លោកជំទាវបណ្ឌិត សឿ សុជាតា មានប្រសាសន៍ថា ជាកិត្តិយសបានចូលរួមក្នុងកម្មវិធីថ្ងៃនេះ ទោះបីគោលដៅកម្មវិធីបានបញ្ចប់គម្រោងស្តីពី សុខភាព និងអនាម័យពេលមានរដូវរបស់ក្មេងស្រី ដែលបានអនុវត្ត លើទឹកដីស្រុករវៀង តាំងពីខែកញ្ញា ឆ្នាំ២០២៤ បានបញ្ចប់ត្រឹមខែកុម្ភៈ ឆ្នាំ២០២៥នេះ។

ទោះបីរយៈពេលនៃកិច្ចសហការរវាងអង្គការទឹកភ្លៀងកម្ពុជាជាមួយក្រសួងអប់រំ យុវជន និងកីឡា មានរយៈពេល ខ្លីក៏ដោយ តែលទ្ធផលនៃគម្រោងបានបញ្ជាក់យ៉ាងច្បាស់ថា ពិតជាបានធ្វើការរួមគ្នាដើម្បីដោះស្រាយប្រធានបទ ដែលមានសារៈសំខាន់បំផុត នោះគឺការពង្រឹងប្រសិទ្ធភាពសុខភាពបន្តពូជសម្រាប់កុមារនិងយុវនារីរបស់យើងដែលនឹង ក្លាយជាសមាជិកមាតាពិភពលោក។ មិនតែប៉ុណ្ណោះបញ្ហានេះស្ថិតនៅចំកណ្តាលនៃសុខុមាលភាពរួមរបស់យើង និងអនាគត ឆ្លើយតបទៅនឹងគោលដៅអភិវឌ្ឍជាតិ២០៣០-២០៥០ ផងដែរ។

ការប្តេជ្ញាចិត្តរបស់រាជរដ្ឋាភិបាល ចំពោះសុខភាពបន្តពូជ មិនត្រឹមបញ្ហាសុខភាពប៉ុណ្ណោះទេ ប៉ុន្តែជាសិទ្ធិជាមូលដ្ឋាន និងជាមូលដ្ឋានគ្រឹះសម្រាប់ការអភិវឌ្ឍរួម របស់ពួកគេ ដែលចាំបាច់ត្រូវចាប់ផ្តើមពីចំណេះដឹង បំណិន និងឥរិយាបថ ពាក់ព័ន្ធទៅនឹងសុខភាពបន្តពូជ ជាពិសេសគឺ ក្មេងស្រីដែលទើបចាប់ផ្តើមនិងកំពុងមានរដូវ។ វាគឺជាមូលហេតុដែលទាមទារការយកចិត្តទុកដាក់និងត្រូវបង្កើតជា សកម្មភាពមិនរំខានដល់ដំណើរការអភិវឌ្ឍរបស់ពួកគេ។ អាស្រ័យហេតុនេះ ក្រសួងអប់រំ យុវជន និងកីឡា ដែលទទួល បានការគាំទ្រពីរាជរដ្ឋាភិបាល ក៏ដូចជាការទទួលបានកិច្ចសហការពីអង្គការដៃគូជាតិ និងអន្តរជាតិ ទោះបីគម្រោងនោះ ខ្លះមានរយៈ ពេលវែង ឬខ្លី ធនធានតិចតួចយ៉ាងណាក្តី រៀបចំជាគោលនយោបាយជាតិស្តីពីសុខភាពសិក្សា ជាផែនការ សកម្មភាពលម្អិត ជាសៀវភៅសិក្សាស្តីពីការអប់រំសុខភាពគ្រប់កម្រិតថ្នាក់ និងបានបណ្តុះបណ្តាលគ្រូឧទ្ទេស គ្រូបង្រៀន និងជនបង្គោលសុខភាពសិក្សាជាបន្តបន្ទាប់ដើម្បីឆ្លើយតបទៅនឹងទិសដៅអភិវឌ្ឍធនធានមនុស្សក្នុងយុគសម័យសត្តវត្ស ទី២១នេះ។

បញ្ហាប្រឈមដែលយុវជនវ័យក្មេងរបស់យើងប្រឈមមុខក្នុងការទទួលបានការអប់រំ និងសេវាកម្មសុខភាពបន្តពូជដ៏ទូលំទូលាយគឺពិតជាស្មុគស្មាញ និងច្រើនមុខ។ ការយល់ច្រឡំ វប្បធម៌ប្រកាន់ទម្លាប់បូរាណ ភាពអៀនញៀន និង ធនធានមិនគ្រប់គ្រាន់ជាញឹកញាប់រារាំងសមត្ថភាពរបស់ពួកគេក្នុងការជ្រើសរើសព័ត៌មានពិត ឬព័ត៌មានមានប្រយោជន៍ ស្តីអំពីសុខភាពបន្តពូជរបស់ពួកគេ។ បង្ការទប់ស្កាត់ឆ្លើយតបទៅនឹងការប្រឈមនេះវាជាកាតព្វកិច្ច របស់យើងទាំងអស់គ្នាជាអ្នកអប់រំ ជាមនុស្សចាស់ជាងក្នុងការបំបែកឧបសគ្គទាំងនេះ និងបង្កើតបរិយាកាសគាំទ្រដែល យុវជនអាចរីកចម្រើនប្រកបដោយគុណភាពនិងប្រសិទ្ធភាព។

បញ្ជាក់ជាថ្មីនូវការក្រើនរំលឹកការប្តេជ្ញាចិត្តរបស់យើងជាបុគ្គលិកអប់រំ មាតាបិតាឬអ្នក អាណាព្យាបាលសិស្ស រដ្ឋអំណាចមូលដ្ឋាន និងអង្គការដៃគូរក្នុងការពង្រឹងអំណាចដល់កុមារ កុមារី យុវជន យុវតី ជាមួយនឹងចំណេះដឹង បំណិនជំនាញ និងធនធានដែលពួកគេត្រូវការដើម្បីដឹកនាំជីវិតដែលមានសុខភាពល្អ រួម មានការផ្តល់ការអប់រំសុខភាពបន្តពូជត្រឹមត្រូវ ជាពិសេសសុខភាពនិងអនាម័យពេលមានរដូវមិនថាពួកគេស្ថិតនៅក្នុងទីប្រជុំជន ឬសហគមន៍ជនបទទេ យុវជននីមួយៗសមនឹងទទួលបានសិទ្ធិស្មើគ្នាក្នុងការថែទាំសុខភាពបន្តពូជប្រកបដោយ គុណភាព និងមានការគាំទ្រពីមនុស្សជុំវិញពួកគេ។ សូមឲ្យអង្គការទឹកភ្លៀងកម្ពុជា មានឱកាសធ្វើការរួមគ្នា ដើម្បីកាត់បន្ថយគម្លាត និងទៅដល់អ្នកដែលងាយរងគ្រោះបំផុត។

ក្នុងនាមថ្នាក់ដឹកនាំក្រសួងអប់រំ យុវជន និងកីឡា នាងខ្ញុំសូមបង្ហាញពីឆន្ទៈថ្លែងអំណរគុណជូនចំពោះអង្គការ ទឹកភ្លៀងកម្ពុជាដែលបានសហការផ្តល់ការគាំទ្រដល់ដំណើរការលើកកម្ពស់សុខភាពនិងអនាម័យពេលមានរដូវរបស់ ក្មេងស្រី ទោះបីសេចក្តីប្រកាសរបស់អង្គការនាពេលនេះត្រូវបានបញ្ចប់ក៏ពិតមែន តែយើងសង្ឃឹមថា អង្គការនឹងវិលមក ចូលរួមសហការលើផ្នែកនេះជាថ្មីនាពេលអនាគតដ៏ខ្លី។ កិច្ចខិតខំប្រឹងប្រែងរបស់យើងនឹងមិនពេញលេញទេ បើគ្មានការ ចូលរួមយ៉ាងសកម្មរបស់យុវជនខ្លួនឯង។ ពួកគេមិនត្រឹមតែជាអ្នកទទួលផលពីគំនិតផ្តួចផ្តើម និងការគាំទ្ររបស់យើង ប៉ុណ្ណោះទេ ប៉ុន្តែជាដៃគូក្នុងការធ្វើដំណើរទៅសម្រេចគោលដៅអភិវឌ្ឍសង្គមនិងសេដ្ឋកិច្ចជាតិផងដែរ ព្រោះថាការចូល រួមពួកគេនៅក្នុងដំណើរការសម្រេចចិត្ត យើងធានាថាយុទ្ធសាស្ត្ររបស់យើងមានភាពពាក់ព័ន្ធ និងមានប្រសិទ្ធភាព។

សូមចងចាំថាភាពរឹងមាំនៃអនាគតប្រទេសយើងស្ថិតនៅលើអ្នកទាំងអស់គ្នា និងផ្អែកលើសុខភាព និង សុខុមាលភាពរបស់កុមារនិងយុវជននៃយើង។ បេសកកម្មរបស់យើងទាំងអស់គ្នានៅទីនេះគឺដើម្បីពង្រឹងសុខភាពបន្តពូជ របស់ប្រជាជនកម្ពុជា សូមឱ្យយើងបន្តធ្វើដូច្នេះដោយការប្តេជ្ញាចិត្ត អាណិតអាសូរ និងចក្ខុវិស័យរួមនៃពិភពលោកដែល មានសុខភាពល្អ និងសមធម៌។

សូមបញ្ជាក់ថា៖ គម្រោងសាកល្បងស្តីពី សុខភាពនិងអនាម័យពេលមករដូវរបស់ក្មេងស្រី នៅតាមសាលារៀន ចាប់ផ្តើមអនុវត្តសកម្មភាពនៅខែកញ្ញា ឆ្នាំ២០២៤ ដល់ខែមករា ឆ្នាំ២០២៥។ គម្រោងកម្មវិធីនឹងផ្តល់កិច្ចគាំ ទ្រដល់សាលារៀនចំនួន២១ ក្នុងនោះមានសាលាបឋមសិក្សាចំនួន១៦ និងអនុវិទ្យាល័យចំនួន៥ នៅក្នុង ស្រុករវៀង ខេត្តព្រះវិហារ ដែលគាំទ្រថវិកាដោយអង្គការ ខេអេចអេ (KHA)។ គោលបំណងនៃកម្មវិធីនេះ គឺជម្រុញការអប់រំផ្សព្វផ្សាយពីសុខភាពនិងអនាម័យពេលមករដូវរបស់ក្មេងស្រីនៅតាមសាលារៀនតាមរយៈ ការកែលម្អបរិក្ខារអនាម័យដែលមានស្រាប់សម្រាប់អនុវិទ្យាល័យចំនួន៥ និងផ្តល់កំណាត់អនាម័យស្ត្រីចំនួន ៧១១ឈុត ទៅដល់សិស្សស្រី ដើម្បីរួមចំណែកកាត់បន្ថយសំឡីប្លាស្ទិច ៕