ព្រះវិហារ៖ ពិធីប្រកាសតែងតាំងចូលកាន់មុខតំណែង ព្រះរាជអាជ្ញា នៃអយ្យការអមសាលាដំបូងខេត្តព្រះវិហារ ក្រោមវត្តមានឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងជាសមាជិកទីមួយ នៃ ឧត្តមក្រុមប្រឹក្សា នៃអង្គចៅក្រម និងមានការចូលរួមពីឯកឧត្តម ប្រាក់ សុវណ្ណ ប្រធានក្រុមប្រឹក្សាខេត្ត ឯកឧត្តម គឹម រិទ្ធី អភិបាល នៃគណៈអភិបាលខេត្ត ឯកឧត្តម យុត ពន្លឺ ប្រធានសាលាដំបូងខេត្តព្រះវិហារ ព្រមទាំងប្រតិភូអមដំណើរ ថ្នាក់ដឹកនាំ មន្ត្រីរាជការជុំវិញខេត្តបានអញ្ជើញចូលរួមផងដែរ។ កម្មវិធីនេះប្រារព្ធឡើងនៅព្រឹក ថ្ងៃទី៤ ខែមិនា ឆ្នាំ២០២៥ នៅសាលាដំបូងខេត្តព្រះវិហារ។

ឯកឧត្តម ធុច បញ្ចសន្តិភាព បានប្ដេជ្ញាចិត្តថា៖ ខ្ញុំបាទនឹងខិតខំយកអស់កម្លាំងកាយ កម្លាំងប្រាជ្ញា ស្មារតី ចំណេះ ដឹង និងបទពិសោធន៍ការងារទាំងអស់ ចូលរួមក្នុងការកែទម្រង់ច្បាប់ និងប្រព័ន្ធយុត្តិធម៌ ស្រប តាមគោលនយោបាយរបស់រាជដ្ឋាភិបាលកម្ពុជា ក្រោមការដឹកនាំដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដោយស្មោះត្រង់ និងបម្រើ ជាតិ សាសនា និងព្រះមហាក្សត្រ។ គោរព និងប្រតិបត្តិតាមរដ្ឋធម្មនុញ្ញ ច្បាប់ជាតិ ច្បាប់អន្តរជាតិ ដែលមានអានុភាពអនុវត្ត ក្នុងព្រះរាជាណាចក្រកម្ពុជា និងលិខិតបទដ្ឋានគតិយុត្តនានា ជាធរមាន។បន្ត និងខិតខំអភិវឌ្ឍន៍ខ្លួនបន្ថែមទៀតលើផ្នែកចំណេះដឹង និងការគ្រប់គ្រង ដឹកនាំស្ថាប័ន ដើម្បីរង់ចាំទទួលកិច្ចការថ្មីៗ ស្របតាមការរីកចំរើនរបស់ប្រទេសជាតិ។

នាឪកាសដែលឯកឧត្តម គីម រិទ្ធី សូមឲ្យព្រះរាជអាជ្ញា នៃអយ្យការអមសាលាដំបូងខេត្តព្រះវិហារ ដែលទើបទទួលភារកិច្ចថ្មីសូម យកចិត្តទុកដាក់ និងត្រៀមលក្ខណៈសម្បត្តិចូលរួមចំណែកផ្តល់កិច្ចសហការ ជាមួយ ក្រសួង ស្ថាប័នពាក់ព័ន្ធ គណៈអភិបាលខេត្ត និងបណ្តាមន្ទីរ អង្គភាពជុំវិញខេត្ត ដើម្បីចូលរួមថែ រក្សា ទប់ស្កាត់ បង្ការ បង្ក្រាបបទល្មើសនានាដែលកើតមានក្នុងភូមិសាស្រ្ដខេត្តព្រះវិហារ។ ហើយត្រូវប្រកាន់ភ្ជាប់ភាពយុត្តិធម៌ ធានា ថែរក្សា ឲ្យបាននូវ សុខ សន្តិភាព ស្ថិរភាព និងសណ្តាប់ធ្នាប់សាធារណៈ ជូនប្រជាពលរដ្ឋ។ ត្រូវចូលរួមលប់បំបាត់ភាពអយុត្តិធម៌។ (ប្រទេសមួយល្អ កើតពីការចូលរួមគោរពច្បាប់)

ឯកឧត្តម កើត រិត បានមានប្រសាសន៍ថា៖ ស្រប តាមគោលនយោបាយរបស់រាជរដ្ឋាភិបាលកម្ពុជា ក្រោមការដឹកនាំដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដើម្បីចូលរួមចំណែកក្នុងការកែទម្រង់វិស័យយុត្តិធម៌ សំដៅលើកកម្ពស់ និងការពង្រឹង ប្រសិទ្ធភាពនៃច្បាប់ និងប្រព័ន្ធយុត្តិធម៌ ក្នុងគោលដៅពង្រឹងនីតិរដ្ឋ និងយុត្តិធម៌ក្នុងសង្គមជាតិ និងធានាថែរក្សាបាននូវសន្តិភាព ស្ថិរភាពសង្គម សន្តិសុខ និងសណ្តាប់ធ្នាប់សាធារណៈ ដែលជា គ្រឹះសម្រាប់ភាពសុខសាន្តរបស់ប្រជាជន និងការអភិវឌ្ឍប្រទេសជាតិ។ ពង្រឹង និងលើកកម្ពស់សមត្ថភាពស្ថាប័នអយ្យការក្នុងការផ្តល់សេវាយុត្តិធម៌ ចំណាត់ ការដោះស្រាយសំណុំរឿងមានភាពម៉ឺងម៉ាត់ស្របតាមនីតិវិធីច្បាប់ជាធរមាន ផ្តល់សេចក្តីសម្រេច ដែលត្រឹមត្រូវ និងយុត្តិធម៌តាមច្បាប់ ពោលគឺនឹងវៀរចាកឱ្យខាងតែបាននូវ អគតិទាំង ៤គឺ ឆន្ទាគតិ (សេចក្តីលំអៀងព្រោះ ស្រឡាញ់) ទោសាគតិ (សេចក្តីលំអៀងព្រោះ ស្អប់) ភយាគតិ (សេចក្តីលំអៀងព្រោះខ្លាច) និង មោហាគតិ (សេចក្តីលំអៀងព្រោះល្ងង់អវិជ្ជា)។ពន្លឿនការរក យុត្តិធម៌ជូនប្រជាពលរដ្ឋ ឱ្យបានឆាប់រហ័ស ព្រមទាំងពង្រឹងការប្រយុទ្ធប្រឆាំង អំពើឈ្លានពាន ដោយអយុត្តិធម៌ក្នុងសង្គម និងពង្រឹងជំនឿទុកចិត្តពីសាធារណៈជនមកលើ វិស័យយុត្តិធម៌។ ពង្រឹងវិន័យផ្ទាល់ខ្លួន និងគោរពឱ្យបានខ្ជាប់ខ្ជួននូវក្រមសីលធម៌វិជ្ជាជីវៈចៅក្រម ព្រះរាជអាជ្ញា ព្រមទាំងប្រកបវិជ្ជាជីវៈដោយសេចក្តីថ្លៃថ្នូរ ត្រឹមត្រូវ សុចរិតភាព និងយុត្តិធម៌ ជា ពិសេសគឺត្រូវប្រកាន់យកនូវ អនាគតំទាំង ៥គឺវិរិយសម្បយុត្ត (ព្យាយាមអត់ធ្មត់ក្នុងការងារ) សុច្ចរិតយុត្តិធម៌ (ធ្វើរឡើងដោយសេចក្តីទៀងត្រង់) បញ្ញាគារវា (គោរពបញ្ញាត្តិនៃច្បាប់) សមទណ្តោ (អនុវត្តគោលការណ៍ស្មើភាពគ្នាចំពោះមុខច្បាប់ចំពោះរាល់ទណ្ឌកម្ម) និង បញ្ញាវុធវិនិច្ឆ័យ (សម្រេចតាមគំនិតរបស់ខ្លួនមិនទទួលការគាបសង្កត់ដើម្បីរក្សាឲ្យបាននូវសេចក្តីថ្លៃថ្នូរវិជ្ជាជីវៈ។ ត្រូវពង្រឹងសាមគ្គីភាពផ្ទៃក្នុង រវាងស្ថប័នសាលាដំបូង និងអយ្យការអមសាលាដំបូងខេត្ត ព្រះវិហារ និងត្រៀមលក្ខណៈសម្បត្តិឱ្យបានគ្រប់គ្រាន់ក្នុងការដឹកនាំផ្នែករដ្ឋបាល និង បច្ចេកទេស នៅអយ្យការអមសាលាដំបូងខេត្តព្រះវិហារ ក្នុងស្មារតីទទួលខុសត្រូវខ្ពស់ និងបង្កើន ប្រសិទ្ធភាពការងារ។

សូមបញ្ជាក់ថា៖ ឯកឧត្តម ធុច បញ្ចសន្តិភាព ត្រូវបានឧត្តមក្រុមប្រឹក្សា នៃអង្គចៅក្រម ធ្វើពិធីប្រកាសចូលកាន់មុខតំណែងនាពេលនេះ ស្រពទៅនឹងការទុកព្រះរាជហឬទ័យ របស់ព្រះមហាក្សត្រ នៃព្រះរាជាណាចក្រ កម្ពុជា ជាទីគោរពសក្ការៈដ៏ខ្ពង់ខ្ពស់បំផុត ត្រាស់បង្គាប់ផ្ទេរ និងតែងតាំងមុខតំណែង ពី ព្រះរាជអាជ្ញារង នៃអយ្យការអមសាលាដំបូងខេត្តព្រះសីហនុ មកជា ព្រះរាជអាជ្ញា នៃអយ្យការ អមសាលាដំបូងខេត្តព្រះវិហារ បន្ទាប់ពីឧត្តមក្រុមប្រឹក្សា នៃអង្គចៅក្រម បានបោះឆ្នោតសម្រេចជា ឯកច្ឆន្ទក្នុងសម័យប្រជុំលើកទី៣៨ នៅក្នុងព្រះបរមរាជវាំង ក្រោមព្រះរាជាធិបតី ភាពដ៏ខ្ពង់ខ្ពស់បំផុត ព្រះករុណាជាអម្ចាស់ជីវិតលើត្បូង ព្រះមហាក្សត្រ នៃព្រះរាជាណាចក្រកម្ពុជា ព្រះប្រធានឧត្តមក្រុមប្រឹក្សានៃអង្គចៅក្រម ជាទីគោរពសក្ការៈដ៏ខ្ពង់ខ្ពស់បំផុត កាលពីថ្ងៃទី១៩ ខែកុម្ភៈ ឆ្នាំ២០២៥ និងបានចេញព្រះរាជក្រឹត្យលេខ នស/រកត/០២២៥/២៧៦ ចុះថ្ងៃទី២១ ខែកុម្ភៈ ឆ្នាំ២០២៥ ដែលបានផ្ទេរ និងតែងតាំងមុខតំណែងថ្មី ជំនួសឯកឧត្តម ទី សុវណ្ណថាល់។ ដោយឯកឧត្តម ទី សុវិនថាល់ ត្រូវបានត្រាស់បង្គាប់ផ្ទេរ និងតែងតាំងមុខតំណែងថ្មី ពីព្រះរាជអាជ្ញា នៃអយ្យការអមសាលាដំបូងខេត្តព្រះវិហារ ទៅជាឧត្តមព្រះរាជអាជ្ញានៃអយ្យការអមតុលាការកំពូល ៕