(ភ្នំពេញ)៖ និយ័តករធានារ៉ាប់រងកម្ពុជា (ន.ធ.ក.) បានចុះអនុស្សរណៈនៃការយោគយល់គ្នា (MOU) ជាមួយវិទ្យាស្ថានអភិវឌ្ឍន៍ធានារ៉ាប់រងកូរ៉េ (KIDI) ដើម្បីបង្កើតទំនាក់ទំនងសហប្រតិបត្តិការនៃកិច្ចការដែលទាក់ទងនឹងការធានារ៉ាប់រងដោយផ្អែកលើអត្ថប្រយោជន៍ និងការអភិវឌ្ឍន៍ទៅវិញទៅមក នាថ្ងៃទី៤ ខែមីនា ឆ្នាំ២០២៥ នៅទីស្តីការ អ.ស.ហ. ។

ក្រោមអធិបតីភាពដ៏ដ៏ខ្ពង់ខ្ពស់ពី ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាអាជ្ញាធរសេវាហិរញ្ញវត្ថុមិនមែនធនាគារ (អ.ស.ហ.) និយ័តករធានារ៉ាប់រងកម្ពុជា (ន.ធ.ក.) ដែលតំណាងដោយឯកឧត្តម ប៊ូ ច័ន្ទនីរូ អគ្គនាយក នៃ ន.ធ.ក. ឯកឧត្តម រស់ សីលវ៉ា រដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ និងជាអនុប្រធានក្រុមប្រឹក្សា អ.ស.ហ. នៃព្រះរាជាណាចក្រកម្ពុជា វិទ្យាស្ថានអភិវឌ្ឍន៍ធានារ៉ាប់រងកូរ៉េ (KIDI) ដែលតំណាងដោយលោក Chang-Eon Heo ប្រធាន និងជានាយក ប្រតិបត្តិនៃ KIDI និងលោក So-Young Kim អនុប្រធាននៃគណៈកម្មការសេវាហិរញ្ញវត្ថុ នៃសាធារណរដ្ឋកូរ៉េ។

ក្នុងឱកាសនោះ ឯកឧត្តម ប៊ូ ច័ន្ទនីរូ បានលើកឡើងថា ការចុះអនុស្សរណៈនេះ គឺដើម្បីបង្កើតទំនាក់ទំនងសហប្រតិបត្តិការនៃកិច្ចការដែលទាក់ទងនឹងការធានារ៉ាប់រងដោយផ្អែកលើអត្ថប្រយោជន៍ និងការអភិវឌ្ឍន៍ទៅវិញទៅមក។ មិនត្រឹមតែប៉ុណ្ណោះ តាមរយៈភាពជាដៃគូនេះ ក៏អាចឱ្យស្ថាប័នទាំងពីរអាចធ្វើការរួមគ្នាប្រកបដោយប្រសិទ្ធភាពលើវិស័យមួយចំនួន ដូចជាការផ្លាស់ប្តូរបុគ្គលិក រួមទាំងការឆ្លងកាត់ទស្សនកិច្ច, ការធ្វើជាម្ចាស់ផ្ទះនៃព្រឹត្តិការណ៍ផ្សេងៗ រួមទាំងសិក្ខាសាលា និងសន្និសីទ និងការផ្លាស់ប្តូរព័ត៌មានទាន់សម័យអំពីឧស្សាហកម្ម និងជាពិសេសគឺការកសាងសមត្ថភាព។

សូមជម្រាបថា ការចុះអនុស្សរណៈនៃការយោគយល់គ្នានេះ ក៏មានការចូលរួមពីគណៈអធិបតី ភ្ញៀវកិត្តិយស ដែលជាថ្នាក់ដឹកនាំជាន់ខ្ពស់ពី អគ្គលេខាធិការដ្ឋាន អ.ស.ហ. និយ័តករក្រោមឱវាទ អ.ស.ហ. មន្ត្រីនៃ ន.ធ.ក. តំណាងសមាគមធានារ៉ាប់រងកម្ពុជា សមាគមជើងសាធានារ៉ាប់រងកម្ពុជា និងតំណាងគ្រឹះស្ថានធានារ៉ាប់រងផងដែរ៕