នារសៀលថ្ងៃទី១២ ខែមីនា ឆ្នាំ២០២៥នេះ មន្ទីរព័ត៌មានខេត្តព្រះវិហារ បានរៀបចំកិច្ចប្រជុំដំណើរការស្ទង់មតិ
ស្ដីពីស្ថានភាពសេរីភាពអ្នកសារព័ត៌មានប្រចាំឆ្នាំ២០២៥ ដើម្បីវាយតម្លៃពីស្ថានភាពសេរីភាពអ្នកសារព័ត៌មាននៅក្នុងខេត្ត និងប្រមូលធាតុចូល សម្រាប់កែលម្អលក្ខខណ្ឌការងាររបស់អ្នកសារព័ត៌មាន។
កិច្ចប្រជុំនេះប្រព្រឹត្តទៅក្រោមអធិបតីភាពលោក សាំ ទូច អនុប្រធានមន្ទីរព័ត៌មានខេត្តព្រះវិហារ តំណាងលោកស្រី ហែម សុគុណពិសី
ប្រធានមន្ទីរព័ត៌មានខេត្ត ដោយមានការចូលរួមពីតំណាងភ្នាក់ងារប្រព័ន្ធផ្សព្វផ្សាយ អ្នកសារព័ត៌មានរដ្ឋ និងឯកជន ពិធីករ ពិធីការិនី អ្នកយកព័ត៌មានអ្ននកផលិតកម្មវិធីវិទ្យុ ទូរទស្សន៍និងគេហទំព័រ សរុបចំនួន ៣៣រូប។
ក្នុងកិច្ចប្រជុំនេះ អ្នកចូលរួមបានពិភាក្សាលើប្រធានបទសំខាន់ៗដូចជា៖ ស្ថានភាពសេរីភាពអ្នកសារព័ត៌មាន ការបញ្ចេញមតិរបស់អ្នកសារព័ត៌មាន លទ្ធភាពទទួលបានព័ត៌មាន សុវត្ថិភាព របស់អ្នកសារព័ត៌មាន ក៏ដូចជាសណ្ដាប់ធ្នាប់ និងក្រមសីលធម៌វិជ្ជាជីវៈសារព័ត៌មានជាដើម។
លោក សាំ ទូច បានមានប្រសាសន៍ថា កិច្ចប្រជុំនេះមានគោលបំណងប្រមូលធាតុចូលពីអ្នកសារព័ត៌មាន
ដើម្បីវាយតម្លៃពីស្ថានភាពសេរីភាពសារព័ត៌មាននៅក្នុងខេត្ត ឆ្នាំ២០២៥ និងកំណត់បញ្ហាប្រឈមនានាដែលអ្នកសារព័ត៌មានកំពុងជួបប្រទះ។
លោកបានសង្កត់ធ្ងន់ថា រាជរដ្ឋាភិបាលកម្ពុជា តែងតែគាំទ្រដល់សេរីភាពសារព័ត៌មាន និងលើកទឹកចិត្តដល់អ្នកសារព័ត៌មាន ឱ្យបំពេញតួនាទីរបស់ខ្លួនប្រកបដោយវិជ្ជាជីវៈ និងក្រមសីលធម៌។
បន្ថែមពីនេះលោកថា ក្រោយបញ្ចប់កិច្ចប្រជុំ មន្ទីរព័ត៌មាន ខេត្តព្រះវិហារ និងទទួលបានលទ្ធផលនៃការស្ទង់មតិពីគ្រប់ប្រតិបត្តិករ ដែលកំពុងប្រតិបត្តិការលើវិស័យព័ត៌មាន
សោតទស្សន៍ក្នុងខេត្តព្រះវិហារ។
អ្នកចូលរួមបានចែករំលែកបទពិសោធន៍ និងទស្សនៈរបស់ពួកគាត់អំពីស្ថានភាពសេរីភាពសារព័ត៌មាននៅក្នុងខេត្ត និងបានលើកឡើងពីបញ្ហាប្រឈមនានាដែលពួកគេកំពុងជួបប្រទះ ដូចជាការខ្វែងគំនិតរវាងអ្នកសារព័ត៌មាន និងអ្នកសារព័ត៌មាន, មិនមានការឯកភាព និងសាមគី្គភាពផ្ទៃក្នុងជាដើម និងបានស្នើដល់មន្ទីរព័ត៌មាន
និងអង្គភាពសារព័ត៌មានទាំងអស់ សូមជួយទម្លាក់រាល់ព័ត៌មាន ដែលផលិតបាន ចូលទៅកាន់គ្រូបអ្នកសារព័ត៌មាន ដើម្បីចែករំលែកនៃការផ្សព្វផ្សាយឱ្យបានទូលំទូលាយនិងស្នើជម្រុញឱ្យមានកិច្ចប្រជុំប្រចាំត្រីមាសរវាងអ្នកសារព័ត៌មាន ជាមួយមន្ទីរជំនាញ ក៏ដូចជាថ្នាក់ដឹកនាំខេត្ត។
ឆ្លងកាត់កិច្ចប្រជុំនាឱកាសនេះ មន្ទីរព័ត៌មានខេត្តព្រះវិហារ នឹងចងក្រងរបាយការណ៍ពីលទ្ធផលនៃការស្ទង់មតិនេះ និងដាក់ជូនក្រសួងព័ត៌មាន ដើម្បីពិនិត្យដោះស្រាយចំពោះបញ្ហាប្រឈមនានាដែលអ្នកព័ត៌មានបានលើកឡើង ៕
