កាលពីថ្ងៃទី ១៦ ដល់ថ្ងៃទី១៩ ខែមីនា ឆ្នាំ២០២៥ សមាគមថ្មអារកម្ពុជា បាននាំយកថ្មអារច្រើនប្រភេទ ទៅដាក់តាំងបង្ហាញជាទ្រង់ទ្រាយធំ នៅក្នុងពិព័រណ៍ពាណិជ្ជកម្មអន្តរជាតិ នៅខេត្តសៀមិន ប្រទេសចិន ដើម្បីពង្រីកពាណិជ្ជកម្មថ្មអារជាសកល រួមទាំងការសម្រេចបាននូវការលើកទង់ជាតិខ្មែរលើឆាកពាណិជ្ជកម្មអន្តរជាតិផងដែរ។

បើតាមលោកស្រី ឡេង ដាវី អនុប្រធានសមាគមថ្មអារកម្ពុជាបានឱ្យដឹងថា ការតាំងពិព័រណ៍ខាងលើនេះ គឺជាការបង្ហាញពីសក្តានុពលវិស័យរ៉ែថ្មអារ ១១ ខេត្ត និង មានក្រុមហ៊ុនរ៉ែ ព្រមទាំងរោងចក្រអារថ្ម ជាង ៦០ក្រុមហ៊ុន ដែលអាចនឹងផលិតថ្មប្លុកលើសពី ៨,០០០m3 ក្នុងមួយឆ្នាំ ជាពិសេសរោងចក្រអាចផលិតថ្ម ក្នុងបរិមាណ ៨០០,០០០m2 ក្នុងមួយឆ្នាំ ដែលនេះគឺជាទំហំដែលអាចផ្គត់ផ្គង់ទៅលើទីផ្សារអន្តរជាតិ នាពេលបច្ចុប្បន្ន និងអាចពង្រីកការវិនិយោគ និងផលិតនាំចេញបានលើសនេះច្រើនដងថែមទៀត។ លោកស្រីបន្តថា នាពេលខាងមុខកម្ពុជាអាចនឹងទទួលបានការវិនិយោគរោងចក្រកែច្នៃថ្មអារ កែច្នៃទាំងថ្មប្លុកក្នុងស្រុក និង ថ្មប្លុកពីបរទេស ជាច្រើនប្រភេទដើម្បីចែកចាយក្នុងស្រុក ក្នុងតំបន់អាស៊ី និង ចែកចាយជាសកលផងដែរ។

លោកស្រី ឡេង ដាវី បានបន្ថែមថា «យើងមិនត្រឹមតែកែច្នៃថ្មសម្រាប់តម្រូវការក្នុងស្រុកនោះទេ ប៉ុន្តែកម្ពុជា ក៏មានតម្រូវការនាំចូលថ្មគ្រប់ប្រភេទចូលទៅកាន់ទីផ្សារកម្ពុជាដែលមានបរិមាណច្រើនម៉ឺនម៉ែត្រការ៉េផងដែរ ។ បច្ចុប្បន្ននេះ ការរីកចំរើនលើវិស័យនេះ និងការបញ្ជាទិញ ការវិនិយោគរោងចក្រដើម្បីកែច្នៃថ្មគឺកំពុងរីកចំរើនឥតឈប់ឈរ ក្រោមការដឹកនាំដ៏ឈ្លាសវៃរបស់សម្តេចធិបតី ហ៊ុនម៉ាណែត នាយករដ្ឋមន្ត្រីនៃប្រទេសកម្ពុជា។»

លោកស្រីបន្តថាដោយមានការគាំទ្រពីរាជរដ្ឋាភិបាលឆ្នាំនេះ សមាគមថ្មអារមានកំលាំងចិត្តនិងបានរួមសហការជាមួយក្រុមហ៊ុនជាច្រើន ក្នុងការរៀបចំឱ្យមានការដាក់តាំងបង្ហាញទាំងផលិតផលថ្មអារ, ការរចនាស្តង់បែបសហសម័យភ្ជាប់ជាមួយចម្លាក់វប្បធម៌ និង ការសម្តែងសិល្បះបុរាណខ្មែរ ឱ្យភ្ញៀវអន្តរជាតិបានទស្សនា និងទាក់ទាញភ្ញៀវទេសចរនៅក្នុងពិព័រណ៍នោះផងដែរ។ កម្ពុជាទទួលបានលទ្ធផលជាវិជ្ជមានជាច្រើនពីការដាក់តាំងបង្ហាញនោះដូចជា ការលក់ ការទទួលបានការបញ្ជាទិញ ការទទួលបានដៃគូសហការធ្វើទីផ្សារទទួលទិញ ដើម្បីចែកចាយបន្តទៅប្រទេសចិន អឺរ៉ុប សហរដ្ឋអាមេរិក អូស្រ្តាលី ហ្វីលីពីន និង នេប៉ាល់ ជាដើម។ ជាពិសេសទទួលបានការសរសើរ ដោយមិននឹកស្មានថាប្រទេសកម្ពុជាមានសក្តានុពលថ្មអារ មានរោងចក្រជាច្រើនដែលកំពុងចែកចាយជុំវិញពិភពលោក។

ជាចុងក្រោយ លោកស្រី ឡេង ដាវី ក៏បានបង្ហាញនូវក្តីរំពឹងថា ដើម្បីសហការគ្នាឱ្យកាន់តែល្អបន្ថែមទៀតនោះ សហគមសង្ឃឹមថា ក្រសួងពាណិជ្ជកម្មនឹងយកចិត្តទុកដាក់ ជួយរៀបចំនិងគាំទ្រដល់ដំណើរការនៃការរៀបចំពិព័រណ៌រួមគ្នានៅថ្នាក់ជាតិ ដោយទៅចូលរួមឱ្យបានច្រើនប្រទេស ច្រើនវិស័យ ផ្សារភ្ជាប់វប្បធម៌ និង អរិយធម៌ខ្មែរដើម្បីទាក់ទាញអ្នកវិនិយោគ ក៏ដូចជាភ្ញៀវទេសចរមកកាន់កម្ពុជាឱ្យកាន់តែច្រើនបន្ថែមទៀត៕